Dowladda Soomaaliya oo u magacawday hoggaamiye ku-meel-gaar ah Koonfur Galbeed

MUQDISHO (Dawan ) – Dowladda Federaalka Soomaaliya ayaa u magacawday Ra’iisul Wasaare Ku-xigeenka 2aad, Jibriil Cabdirashiid Xaaji Cabdi, inuu noqdo hoggaamiyaha ku-meel-gaarka ah ee Dowlad Goboleedka Koonfur Galbeed, sida lagu sheegay digreeto uu saxiixay Ra’iisul Wasaaraha, Xamza Cabdi Barre habennimadi Arbacada.

Magacaabistan oo dhaqan gashay 1-da Abriil ayaa lagu sheegay mid lagu xaqiijinayo sii socoshada maamulka, sugidda amniga iyo adeegyada dowladeed, kadib isbeddello siyaasadeed oo ka dhacay maamulkaas.

Digreetada ayaa tilmaamaysa in hoggaamiyaha ku-meel-gaarka ah uu xilka hayn doono inta lagu jiro muddada kala guurka ilaa laga soo dooranayo hoggaan rasmi ah.

“Magacaabistani waxay ku aaddan tahay xaqiijinta sii socoshada maamulka, ilaalinta xasilloonida siyaasadeed, amniga iyo kala dambeynta dowladeed, iyo danta guud ee shacabka,” ayaa lagu yiri digreetada.

Waxaa sidoo kale lagu sheegay in hoggaamiyaha ku-meel-gaarka ah uu dardargelin doono wadatashiyada iyo geeddi-socodka doorasho qof iyo cod ah oo lagu dhameystirayo maamulka Koonfur Galbeed.

Digreetada ayaa faraysa hay’adaha dowladda heer federaal iyo heer dowlad goboleed, iyo sidoo kale saaxiibada caalamiga ah, inay la shaqeeyaan hoggaanka cusub si aanay u hakad gelin howlaha socda.

“Dhammaan hay’adaha dowladda iyo saaxiibada caalamiga ah waxaa la farayaa inay la shaqeeyaan hoggaamiyaha ku-meel-gaarka ah si loo xaqiijiyo fulinta waajibaadka ku xusan digreetadan,” ayaa lagu yiri.

Mas’uuliyiinta ayaa sheegay in nidaamkan ku-meel-gaarka ah uu sii socon doono ilaa laga soo dhiso hoggaan sharciyeysan oo rasmi ah.

Tallaabadan ayaa timid kadib markii madaxweynihii hore ee Koonfur Galbeed, Cabdicasiis Xasan Maxamed “Laftagareen”, uu is-casilay, xilli ay jireen xiisado siyaasadeed oo ka taagnaa maamulka.