Jabuuti oo hirgelisay xarun lagu dayactiro maraakiibta

Jabuuti (Dawan) – Madaxweynaha Jabuuti, Ismaaciil Cumar Geelle, ayaa Khamiistii daahfuray Xarunta Dayactirka Maraakiibta ee Djibouti, taas oo uu ku tilmaamay isku-xirka ka maqnaa nidaamka dekedaha dalka.

Xaruntan oo ay dhistay shirkadda Damen Group ayaa ah tan ugu weyn gobolka iyo guud ahaan xeebaha Bariga Afrika, waxaana loogu talagalay inay bixiso adeegyo dayactir iyo farsamo oo loogu sameeyo maraakiibta mara marin-biyoodka gobolka.

Madaxweyne Geelle ayaa sheegay in dekedaha casriga ah aysan ku koobnayn oo keliya dejinta iyo dhoofinta badeecadaha, balse ay yihiin nidaam isku-dhafan oo ay ku jiraan adeegyo farsamo, saadka iyo warshadaha hal-abuurka.

“Ma jiri karto qaab-dhismeed badeed oo waara haddii aan la helin dayactir joogto ah iyo wax ka qabasho degdeg ah,” ayuu yiri madaxweynuhu, isaga oo xusay muhiimadda xaruntan u leedahay badbaadada iyo kalsoonida maraakiibta.

Xaruntan ayaa la filayaa inay daboosho baahiyaha maraakiibta mara Badda Cas iyo Bariga Afrika ee dhinaca farsamaynta iyo dayactirka, iyadoo sidoo kale la jaanqaadaysa shuruudaha caymiska iyo hay’adaha qiimeeya maraakiibta.

Jabuuti oo ku taalla marin-badeed istaraatiiji ah oo isku xira suuqyada caalamka, ayaa u aragta mashruucan mid kor u qaadaya tartanka dekedaha iyo horumarinta dhaqaalaha buluugga. Madaxweynuhu waxa uu sidoo kale xusay in mashruucani abuuri doono shaqooyin xirfad leh, isla markaana kobcin doono aqoonta iyo khibradda shaqaalaha dalka ee dhinaca xirfadaha badda. Tallaabadan ayaa imaanaysa xilli Jabuuti ay sii xoojinayso istaraatiijiyaddeeda ku aaddan dhismaha nidaam dekedeed oo dhammaystiran, kaas oo isku dheelli tiraya waxqabadka, tartanka caalamiga ah iyo ilaalinta deegaanka.