Kaararka codbixinta oo la gaarsiiyay Walawayn iyo Marka

Shabeellaha Hoose (Dawan) — Guddiga Madaxa Bannaan ee Doorashooyinka Qaranka ayaa shalay gaarsiiyay kaararka codbixinta magaalada Marka iyo Walawayn, gobolka Shabeellaha Hoose, kuwaas oo loogu talagalay doorashada golayaasha deegaanka.

Tallaabadan ayaa qeyb ka ah dadaallada lagu xoojinayo geeddi-socodka dimuqraadiyada iyo hubinta in muwaadiniintu helaan fursad ay ku doortaan hoggaankooda deegaanka.

Degmooyinkaan, waxaa horey uga socday diiwaangelinta codbixinta, iyadoo qaadashada kaararka codbixintu socon doonto muddo hal bil ah.

Guddoomiyaha degmada Marka, Cadaani Axmed Diqow, guddoomiye ku xigeenka arrimaha bulshada, iyo taliyaha nabadsugida degmada ayaa wafdiga guddiga ku soo dhaweeyay, iyagoo shacabka ku booriyay in qof walba oo hore u diiwaangashan uu qaato kaarka codbixinta si uu uga qayb qaato doorashada, taasoo muhiim u ah xoojinta horumarka iyo dowlad-wanaagga degmada.

Dhanka kale, kusimaha guddoomiyaha degmada Walawayn, Yuusuf Cali Buule, ayaa sidoo kale sheegay muhiimadda ay leedahay in bulshada ay qaataan kaarka codbixinta si ay uga qeyb qaataan doorashada.

Guddiga doorashooyinka madaxa banaan ayaa horay u sheegay in 36 degmo oo ka tirsan dowlad-goboleedyada Koofur-galbeed, Galmudug, Waqooyi Bari, iyo Hirshabeele in laga ka qaban doono doorashooyinka golayaasha deegaanka oo qof iyo cod ah, si la mid ah tii gobolka Banaadir ka dhacday 25 December 2025.