Mareykanka oo Soomaaliya ku wargeliyay in aan looga tashan kaalmada abaaraha

Muqdisho (Dawan) – Guddoomiyaha Hay’adda Maareynta Musiibooyinka Qaranka (SODMA), Maxamuud Macallin Cabdulle, ayaa sheegay in dowladda Mareykanka ay ku wargelisay in sanadkan aan looga tashan doonin gurmad ku saabsan abaaraha ka jira dalka.

Guddoomiyaha SODMA ayaa hadalkan ka jeediyay barnaamij Twitter Space ah oo ay qabatay Dawan, kaasoo looga hadlayay xaaladda sii xumaaneysa ee abaaraha ka jira qaybo badan oo Soomaaliya ah iyo dadaallada lagu maareynayo gurmadka bani’aadannimo.

Maxamuud Macallin ayaa sheegay in Soomaaliya ay dadaal badan gelisay isku-duwidda gargaarka ay bixiyaan deeq-bixiyeyaasha caalamiga ah, oo ay ka mid yihiin Bangiga Adduunka (World Bank), Midowga Yurub (EU), iyo Mareykanka, balse waxa uu xusay in safiirkii Mareykanka Richard Riley uu u sheegay in dhinacooda aan looga tashan gurmad ku saabsan abaaraha.

“Waxaan runtii qabanay shaqo badan oo ku saabsan isku-duwidda gargaarka, oo ay ku jiraan deeq-bixiyeyaasha sida World Bank, EU, iyo Mareykanka. Si kastaba ha ahaatee, safiirka Mareykanka mar aan la kulmay ayaa ii sheegay in aanan si buuxda ugu tashan,” ayuu yiri Maxamuud Macallin.

Hadalka Guddoomiyaha SODMA ayaa imaanaya xilli abaarta ka jirta Soomaaliya ay saameyneyso malaayiin qof, iyadoo gobollo badan ay la tacaalayaan biyo la’aan, cunno yari, iyo xaalado nololeed oo sii adkaanaya.

Hay’adaha dowladda iyo kuwa caalamiga ah ayaa wada dadaallo lagu xoojinayo isku-duwidda gurmadka iyo taageerada bani’aadannimo, si loo yareeyo saameynta abaaraha oo marar badan sababa barakac, khasaaro xoolo, iyo xaalado bani’aadannimo oo degdeg ah.

Safiirka Mareykanka ayaa sidoo kale sheegay in aysan intaas ku ekaan, balse ay raadiyeen wadamo kale oo ka taageera gurmadka, sida dowladda Turkiga oo qeyb ka qaadata taageerada bini’aadantinimo ee Soomaaliya.

Mareykanka ayaa ahaa wadanka ugu badan ee Soomaaliya ka taageera arrimaha bini’aadantinimada sanadihii u dambeeyay, iyadoo sanadihii danbe uu yaraaday kaalintii uu ka geystay.