NIRA oo xafiis ka furatay safaaradda Soomaaliya ee Nairobi

Nairobi (Dawan ) – Soomaaliya ayaa ka furtay xafiis ka tirsan Hay’adda Aqoonsiga iyo Diiwaangelinta Qaranka (NIRA) safaaraddeeda Nairobi, iyadoo tallaabadan looga gol leeyahay in la ballaariyo helitaanka dukumentiyada aqoonsiga ee Soomaalida ku nool dibadda.

Munaasabadda furitaanka oo ay ka qeybgaleen diblomaasiyiin iyo mas’uuliyiin sare ayaa waxaa si wadajir ah u guddoomiyay Safiirka Soomaaliya ee Kenya, Jabriil Ibraahim Cabdulle, iyo Agaasimaha Guud ee NIRA, Cabdiweli Cali Cabdulle.

“Tani ma aha oo kaliya tallaabo maamul. Waa fariin loo dirayo bulshada Soomaaliyeed ee ku nool Kenya in dowladdu ay aragto oo ay dooneyso inay gaarto,” ayuu yiri Safiir Jabriil.

Agaasimaha Guud ee NIRA, Cabdiweli Cali Cabdulle, ayaa sheegay in tallaabadan ay muujinayso isbeddel ku yimid habka bixinta adeegyada, isagoo xusay in hay’addu ay doonayso inay adeegyada u geyso muwaadiniinta meel kasta oo ay joogaan.

"Waxaan dhiseynaa nidaam aqoonsi qaran oo raaca muwaadiniinta, halkii ay ka sugi lahaayeen inay iyagu noo yimaadaan,” ayuu yiri.

Xafiiska Nairobi ayaa noqonaya goobtii 30-aad ee NIRA ka hirgeliso adeegyada diiwaangelinta, taasoo ka tarjumeysa dadaalka dowladda ee lagu gaarsiinayo adeegyada aqoonsiga gudaha dalka iyo dibaddiisaba.

NIRA waxaa loo aas aasay in ay mideyso nidaamyadii kala daadsanaa ee diiwaangelinta shacabka Soomaaliya isla markaana ay bixiso kaararka aqoonsiga qaran ee biometric-ka ah. Muddo ka badan soddon sano, burburkii iyo kala qeybsanaantii dalka ayaa sababay in malaayiin qof aysan helin dukumenti aqoonsi rasmi ah, taasoo saameyn ku yeelatay helitaanka adeegyada maaliyadeed, xaaladda sharci iyo xiriirka u dhexeeya muwaadinka iyo dowladda.

Soomaalida ku nool Kenya, oo ah mid ka mid ah bulshooyinka qurbaha ugu waaweyn, ayaa si gaar ah u wajahday caqabaddan, iyadoo badankood ay ku tiirsanaayeen dukumentiyo kala duwan oo aan buuxin shuruudaha hay’adaha.

Xafiiska cusub ayaa u oggolaanaya Soomaalida ku sugan Kenya inay codsadaan isla markaana qaataan kaararkooda aqoonsiga qaran iyaga oo aan u safri doonin Soomaaliya, taasoo meesha ka saareysa caqabadaha dhaqaale iyo safar ee jiray.

Safiir Jabriil ayaa sheegay in xafiisku si degdeg ah u bilaabi doono qaadashada codsiyada, isagoo xusay in safaaraddu ay ka go’an tahay fududeynta iyo hufnaanta habka adeeg bixinta.

Mas’uuliyiintu waxay sheegeen in tallaabadan ay muujineyso dadaalka Soomaaliya ee lagu ballaarinayo gaarsiinta hay’adaha dowladda iyo dhismaha nidaam dowladeed oo shaqeynaya.