Ankara (Dawan)- Soomaaliya iyo Turkiga ayaa si rasmi ah u bilaabay hirgelinta heshiis laba geesood ah oo muddo ku dhow toban sano hakad ku jiray, kaas oo quseeya shaqaalaha iyo ilaalinta bulshada, taas oo ay laba dal uga gol leeyihin xoojinta xiriirka istaraatiijiga ah ee iskaashiga dhinaca horumarinta suuqyada shaqada.
Hirgelinta heshiiskan ayaa si rasmi ah uga dhacday caasimadda Turkiga ee Ankara, iyadoo la dhaqan gelinayo Is-afgarad markii ugu horreysay la saxiixay bishii Juun 2016, balse aan horey u shaqayn. Heshiiskan ayaa diiradda saaraya casriyeynta sharciga shaqaalaha, kor u qaadista badbaadada goobaha shaqada, iyo ballaarinta fursadaha shaqo iyo tababarrada farsamada gacanta, gaar ahaan dhalinyarada Soomaaliyeed.
Munaasabadda waxaa goob jooga ahaa; Wasiirka Shaqada iyo Amniga Bulshada ee Turkiga, Vedat Işıkhan, iyo Wasiirka Shaqada iyo Arrimaha Bulshada ee Soomaaliya, Saalim Caliyoow Ibrow. Tani waxay daba socotaa ansixintii Golaha Wasiirrada Soomaaliya ee heshiiskan bishii Luulyo 2025, iyo kulamo diyaargarow ah oo heer sare ah oo horay uga dhacay magaalada Dooxa dabayaaqadii sannadkii hore.
War qoraal ah oo uu Wasiir Işıkhan ku baahiyay barta X ayuu ku sheegay in labada dal ay yeesheen kulankii ugu horreeyay ee Guddiga Wadajirka ah ee heer Wasiir, kaas oo ay ka qeybgaleen wufuud ka kala socotay labada dhinac. Waxa uu xusay in Qorshe-hawleedka 2026–2027 ee lagu saxiixay kulanka uu xoojin doono iskaashiga jira, isla markaana uu fududeyn doono is-weydaarsiga aqoonta iyo khibradda ee u dhexeeya wasaaradaha labada dal.
