Soomaaliya, 28 Febraayo 2026 (Dawan)– Hay’adda Maareynta Musiibooyinka Qaranka (SoDMA) ayaa billowday hawlgal biyo-dhaamin degdeg ah oo laga fulinayo dowlad-goboleedka Galmudug, iyadoo abaarta sii xoogeysaneysa ay kumannaan qoys ku reebtay biyo la’aan daran.
Guddoomiyaha hay’adda, Maxamuud Macallin Cabdulle, ayaa maanta oo Sabati ah ka daahfuray gargaarkan Xeraale. Hawlgalkan ayaa lagu gaarsiinayaa 70 booyadood oo biyo ah si loo yareeyo baahida oonka ee ka jirta degmada iyo deegaannada miyiga ah ee ku xeeran.
Isagoo la hadlayay bulshada deegaanka, Cabdulle ayaa xaaladda ku tilmaamay mid “aad u baahsan” kaddib markii uu indhihiisa ku arkay khasaaraha soo gaaray xoolaha iyo barakaca dadka deegaanka.
“Bixinta biyaha waa mudnaantayada koowaad. Waxaan sidoo kale ku dadaali doonnaa gaarsiinta gargaar raashin ah,” ayuu yiri. “Abaartani kuma koobna hal deegaan ama hal gobol; waa dhibaato saameysay dalka oo dhan.” ayuu sidoo kale yiri.
