Muqdisho (Dawan)– Wasiiru Dowlaha Arrimaha Dibadda, ahna u qaabilsanaha Soomaaliya ee Ururka Bariga Afrika, Cali Maxamed Cumar (Cali Balcad), ayaa faahfaahin ka bixiyay halka uu marayo hannaanka ay Soomaaliya ugu biireyso Bulshada Bariga Afrika, isaga oo wareysi siiyay barnaamijka Miizaan Podcast ee ka baxa Dawan Media.
Wasiirku wuxuu sheegay in Soomaaliya ay ilaa hadda dhammaystirtay qiyaastii 25 ilaa 26 % shuruudihii looga baahnaa ku biirista iyo la jaanqaadka hannaanka Bulshada Bariga Afrika, isaga oo tilmaamay in hannaankani yahay mid dheer oo ay dalalka xubnaha ka ah dhammaantood soo mareen.
“Intaan buuxinnay shuruudihii naloo dejiyay waa 25 ilaa 26 %... Waxaa weli jira waddo dheer oo la maro, balse waa hannaan caadi ah oo dal kasta soo maray,” ayuu yiri Wasiir Cali Balcad.
Wasiirka ayaa xusay in Kenya ay tahay waddanka ugu horreeya ee dhammaystiray heer sare oo shuruudaha ka mid ah, isaga oo tilmaamay in ay gaartay ku dhowaad 60 %, taas oo muujinaysa kala duwanaanshaha heerarka ay marayaan dalalka xubnaha ka ah Bulshada Bariga Afrika.
