MUQDISHO (Dawan) – Dowlad-goboleedka Koonfur Galbeed ayaa ku eedeeyay Dowladda Federaalka Soomaaliya inay faafinayso warar marin-habaab ah iyo dacaayad, iyadoo diiday eedeymo dhawaan lagu xiriiriyay hoggaankeeda kooxda Al-Shabaab.
War-saxaafadeed laga soo saaray magaalada Baydhabo caawa oo Axad ah, ayaa maamulka si adag ugu cambaareeyay waxa uu ku tilmaamay “warar marin-habaab ah oo aan sal lahayn” oo dowladda federaalka ay ku beegsaneyso hoggaankeeda, hay’adaha iyo jiritaankeeda.
Jawaabtan ayaa timid kaddib markii dowladda federaalka ay ku eedeysay Madaxweynaha Koonfur Galbeed Cabdicasiis Xasan Maxamed (Laftagareen) iyo Guddoomiyaha Golaha Wakiillada Cali Saciid Faqi ee lagu doortay doorashada la isku khilaafsan yahay inay xiriir la leeyihiin Al-Shabaab, iyadoo ku saleysay xog ay sheegtay in laga helay howlgal ka dhacay Daynuunay ee gobolka Bay.
Koonfur Galbeed ayaa diiday eedeymahaas, iyadoo sheegtay inay wiiqayaan kalsoonida shacabka isla markaana khatar gelinayaan midnimada, nabadda iyo xasilloonida dalka.
Maamulka ayaa sidoo kale muujiyay walaac amni, isagoo ku eedeeyay dowladda federaalka inay xiriir qarsoodi ah la leedahay Al-Shabaab, eedeymo aan si madax-bannaan loo xaqiijin karin.
