SOOMAALIYA (Dawan ) – Soomaaliya ayaa sheegtay in dhibaatada biyuhu ay sal u tahay musiibooyinka cimilada ee dalka ku soo noqnoqda, iyadoo masuuliyiintu ku baaqeen maalgelin xooggan oo joogto ah si looga gudbo gurmad degdeg ah loona gaaro adkaysi waqti dheer ah.
Isagoo ka hadlayay furitaanka Shirka Arrimaha Bini’aadannimada Soomaaliya (CHF) Axaddii, Guddoomiyaha Hay’adda Maareynta Musiibooyinka Qaranka (SoDMA), Maxamuud Macallin Cabdulle, ayaa sheegay in dalka uu weli wajahayo abaaro iyo fatahaado soo noqnoqda oo barakiciya bulshooyinka isla markaana kordhiya baahiyaha bani’aadannimo, isagoo xusay in Soomaaliya ay “weli ka jawaabayso isla dhibaatooyinkii sanadba sanadka ka dambeeya.”
Wuxuu tilmaamay in ku dhowaad 6.5 milyan oo qof ay wajahaan cunto-yari, halka in ka badan 2 milyan ay ku jiraan xaalad degdeg ah, iyadoo ku dhowaad 2 milyan oo carruur ah ay la ildaran yihiin nafaqo-darro.
Guddoomiyuhu wuxuu sheegay in helitaanka biyaha uu weli yahay caqabad weyn, iyadoo qiyaastii 280 ceel-biyood ay shaqeyn la’yihiin, isla markaana qiimaha biyaha uu gaarayo inta u dhaxaysa $12 ilaa $15 halkii fuusto oo 200-litir ah meelaha qaar, taasoo ka dhigeysa biyaha nadiifka ah kuwo aan la gaari karin qoysaska nugul, isagoo carrabka ku adkeeyay in “xaaladdani aysan sii jiri karin” loona baahan yahay in laga guuro ka falcelinta musiibooyinka loona wareego ka hortagooda.
Maxamuud Macallin Cabdulle ayaa sheegay in dowladda ay waddo hannaan cusub oo diiradda saaraya ka hortagga, diyaargarowga iyo adkaysiga, oo ay ku jirto iskaashi ka dhexeeya qeybaha biyaha, beeraha, caafimaadka iyo ilaalinta bulshada.
