Geeska Afrika, 16 Janaayo 2026 (Dawan) — Dalalka ku yaalla Geeska Afrika ayaa wajahaya sannad doorasho oo xasaasi ah 2026, iyadoo Itoobiya, Jabuuti, iyo Soomaaliya ay ka mid yihiin waddamada la filayo inay qabtaan doorashooyin saameyn weyn ku yeelan kara jihada siyaasadeed iyo xasilloonida gobolka. Doorashooyinkan ayaa imanaya xilli gobolka uu la daalaa dhacayo caqabado is biirsaday oo ay ka mid yihiin amni, khilaafaad siyaasadeed, iyo cadaadis dhaqaale.
Itoobiya:
Itoobiya ayaa qorshaynaysa doorashooyin guud 1-da Juun 2026 si loo doorto xubnaha Golaha Wakiillada, taas oo go’aamin doonta hoggaanka xukuumadda federaalka. Doorashadan ayaa imanaysa kaddib dib-u-dhacyo hore iyo doorashadii 2021 oo lagu qabtay xaalad amni oo adag, gaar ahaan dagaalkii Tigray. Inkasta oo dagaalkaas la soo afjaray, haddana weli waxaa jira walaac la xiriira amniga gobollada Oromia iyo Amhara, taas oo saameyn ku yeelan karta habsami u socodka doorashada. Xisbiga talada haya ee Barwaaqo, ayaa hadda haysta inta badan kuraasta baarlamaanka, waxaana indhaha lagu hayaa sida ay doorashadu u dhici doonto marka la eego nidaamka federaalnimo ee ku dhisan qoomiyadaha.
Jabuuti:
Jabuuti ayaa la filayaa inay qabato doorasho madaxweyne sanadka 2026, inkastoo aan wali la shaacin taariikhda saxda ah. Madaxweynaha hadda talada haya, Ismaaciil Cumar Geelle, ayaa la filayaa inuu mar kale u tartamo xilka. Doorashadan ayaa imanaysa kaddib wax-ka-beddel dastuuri ah oo meesha ka saaray xaddidaadda da’da, halka mucaaradku ay ka cabanayaan xannibaadda bannaanbaxyada siyaasadeed iyo tartan xaddidan.
Soomaaliya:
Soomaaliya ayaa sidoo kale ku wajahan doorashooyin la filayo sanadka 2026, inkasta oo weli muran ka taagan yahay nooca doorashada — mid dadweyne (hal qof, hal cod) ama nidaamka siyaasadeed ee hadda jira ee qabiilka ku dhisan. Doorashooyinka ayaa ku soo beegmaya xilli uu jiro khilaaf u dhexeeya dowladda federaalka iyo qaar ka mid ah dowlad-goboleedyada. Lama hubi in sanadkaan ay dhici doonto doorasho qof iyo cod ah, iyadoo dowladda ay ku doodeyso in ay dalka ka dhici karto doorasho noocaas ah oo gobolka Banaadir ay ka dhacday 25 December 2025. Dhanka kale, mucaaradka ayaa ku doodaya in aysan macquul ahayn doorasho qof iyo cod ah loona baahan yahay in laga heshiiyo hanaanka doorasho ee soo socda.
Mudda xileedka madaxweynaha ayaa ku eg bisha May 2026
