Muxuu yahay sharciga ilaalinayay Soomaalida ee uu Mareykanku joojiyay?

Washington (Dawan)— Dowladda Mareykanka ayaa ku dhawaaqday inay soo afjartay barnaamijkii loo yaqaanay Xaaladda Ilaalinta Ku-meelgaarka ah oo ay ka faa’iideystaan kumannaan muwaadiniin Soomaali ah oo ku noolaa gudaha dalkaas, iyadoo lagu wargeliyay in ay dalka ka baxaan ugu dambayn 17-ka Maarso 2026.

Go’aankan, oo ay shaacisay Wasaaradda Amniga Gudaha Mareykanka, ayaa si toos ah u saameynaya Soomaalida muddada dheer ku noolaa dalkaas, kuwaas oo ku tiirsanaa sharcigan si ay si sharci ah ugu noolaadaan ugana shaqeeyaan Mareykanka.

Waa maxay sharciga xaaladda Ilaalinta Ku-meelgaarka ?

Sharciga Xaaladda Ilaalinta Ku-meelgaarka ah, waa barnaamij sharci ah oo Mareykanku siiyo muwaadiniinta kasoo jeeda dalal ay ka jiraan dagaallo, masiibooyin dabiici ah, ama xaalado amni oo halis ah, kuwaas oo ka dhigaya mid aan ammaan ahayn in muwaadiniintaas dib loogu celiyo dalkooda hooyo.

Sharcigan ma siinayo qofka jinsiyad ama deganaansho rasmi ah, balse wuxuu u oggolaanayaa:

· In uu si ku-meel-gaar ah ugu noolaado Mareykanka

· In uu helo oggolaansho shaqo

· In aan la masaafurin inta sharcigu shaqeynayo

Goorma ayay Soomaalidu heleen sharcigaan?

Barnaamijkan waxaa markii ugu horreysay loo sameeyay Soomaalida Sebtembar 1991, xilligii uu dalka galay burburkii dowladnimo iyo dagaalladii sokeeye. Tan iyo xilligaas, Mareykanku wuxuu marar badan kordhiyay muddada sharcigan ee Soomaalida, iyadoo lagu salleynayo xaaladda amni ee dalka.

Maamulka madaxweynihii hore ee Dimuqraadiga ahaa, Joe Biden, ayaa kordhiyay muddada sharcigan ilaa 17-ka Maarso 2026.

Maxay tahay sababta hadda loo joojiyay?

Wasiiradda Amniga Gudaha Mareykanka, Kristi Noem, ayaa sheegtay in qiimeyn ay sameeyeen ay ku ogaadeen in xaaladda Soomaaliya ay “ka soo hagaagtay heerkii hore,” isla markaana muwaadiniinta Soomaaliyed aysan mar dambe buuxin karin shuruudihii sharcigan.

“Magacu waa cad yahay; ku-meel-gaar micnaheedu waa ku-meel-gaar,” ayay tiri Noem, iyadoo intaas ku dartay in sii oggolaanshaha joogitaanka Soomaalida uu hadda ka hor imanayo danaha qaran ee Mareykanka.

Immisa Soomaali ah ayuu saameynaya go’aankan cusub?

Sida ay sheegtay Wasaaradda Amniga Gudaha:

· Qiyaastii 2,500 Soomaali ah ayaa hadda ka faa’iideysta sharcigan.

· Ku dhowaad 1,400 kale ayaa iyaguna weli codsiyadoodu sugaya

Inta badan Soomaalida ku nool gobolka Minnesota waa muwaadiniin Mareykan ah, balse go’aankan wuxuu si gaar ah u taabanayaa kuwa aan weli helin jinsiyad ama sharci kale oo joogto ah.

Maxaa xigi doona?

Kadib 17-ka Maarso 2026, Soomaalida haysatay sharcigan kumeel gaaraka ah ma heli doonaan:

· Xuquuq ay kusii joogaan Mareykanka

· Oggolaanshaha shaqada

· Haddii aan la helin sharci kale oo beddel u noqda, waxay wajihi karaan halis masaafurin.

Go’aankan ayaa imanaya xilli Mareykanku uu sii adkeynayo siyaasadaha socdaalka, isla markaana uu kala saarayo muhaajiriinta ku-meel-gaarka ah iyo kuwa haysta sharciyo joogto ah. Waxaase la filayaa in arrintan ay dhaliso doodo sharci iyo mid siyaasadeed, gaar ahaan bulshooyinka ay sida tooska ah u saameyneyso.