5 arrimood oo ay tahay inaad ka ogaato doorashada gobolka Banaadir

Muqdisho 24 Diseembar 2025 (Dawan)- Doorashada golayaasha deegaanka ee degmooyinka gobolka Banaadir ayaa lagu wadaa in ay dhacdo Khamiista, 25 Diseembar 2025. Inkastoo guddiga madaxa bannaan ee doorashooyinka iyo xuduudaha (NIEBC) uu shaaciyay liiska musharaxiinta, haddana waxaa jira dhowr arrimood oo ay tahay inaad ka ogaato qaabka doorashada.

1. Qeybinta degmooyinka iyo kuraasta:

Degmooyinka gobolka Banaadir waxaa loo qaybiyay labo qaybood: A oo leh 27 kursi, iyo B oo leh 21 kursi. Qeybintan ayaa saameyn ku leh sida ururrada siyaasadeed u qorsheynayaan musharaxiintooda iyo istiraatiijiyadda tartanka.

Arrintan waxay sidoo kale dood ka dhaxdhalisay bulshada kuwaas oo isweydiinaya arrimaha lagu salleeyay qeybinta

2. Tirada ururrada siyaasadeed iyo muarashaxiintooda:

Guddigu waxa uu shaaciyay magacyada 20 urur siyaasadeed oo soo gudbiyay muarashaxiintooda kuwaas oo gaaraya 1,604 musharax. Ururka Cadaaladda iyo Wadajirka oo ah ururka uu madaxweyne Xasan Sheekh hogaaminayo ayaa ah kan ugu badan musharaxiinta, oo gaara 390 muarashax, taasoo ka dhigan in degmo kasta ay ku leeyihiin tartan dhameystiran.

3. Farqiga ragga iyo dumarka:

Liiska guddiga ayaa muujinaya in 1,243 musharaxiinta ay yihiin rag, taas oo ka dhigan 77% halka 361 (23% ) kalena ay yihiin haween. Tiradu waxay ay muujineysa inuu jiro farqi dhanka jinsiga ah. Sidoo kale, 69% musharaxiinta waxay da’doodu ka hooseysaa 36 sano, taasoo ka tarjumeysa in doorashadan ay dhalinyaradu ka yihiin qeybta ugu firfircoon.

4. Degmooyinka laga reebay doorashada:

Degmooyinka Kaxda, Daarusalaam, Gubadley, iyo Garasbaaley ayaan ku jirin liiska goobaha doorashada, taasoo dhalinaysa su’aalo ku saabsan sababaha ka dambeeya ka-saarista degmooyinkan.

5. Qaacdacaadda Mucaaradka:

Inta badan siyaasiyiinta Mucaardka ayaa qaadacay doorashada gobolka Banaadir, iyaga oo dhaliilsan hannaanka loo maray dhisma guddiga doorashooyinka iyo qoshaha ay dowladdu ku dooneyso iny ku hirgeliso doorasho qof iyo cod ah. Waxay ku doodayaan in loo baahanyahay heshiis siyaasadeed oo dhameystiran si doorashadu u noqoto mid hufan oo lagu kalsoonaan karo.