Laascaanood (Dawan)— Munaasabadda caleema-saarka hoggaanka cusub ee Dowlad-goboleedka Waqooyi Bari Soomaaliya, oo ka dhacaysa magaalada Laascaanood, ma aha oo kaliya xaflad maamul, balse waxay isu beddeshay imtixaan siyaasadeed oo lagu cabbirayo heerka xiriirka u dhexeeya Dowladda Federaalka Soomaaliya iyo dowlad-goboleedyada dalka, xilli ay sii xoogaysanayaan kala aragti duwanaanshaha siyaasadeed ee gudaha.
Hoggaanka sare ee Dowladda Federaalka
Xafladda waxaa si buuxda uga qeyb galay hoggaanka ugu sarreeya dalka, oo ay ka mid yihiin Madaxweynaha Jamhuuriyadda Federaalka Soomaaliya, Ra’iisul Wasaaraha, iyo xubno tiro badan oo ka tirsan golayaasha fulinta iyo sharci-dejinta. Joogitaanka mas’uuliyiintan heerka sare ah ayaa loo arkaa muujin cad oo aqoonsi siyaasadeed iyo sharciyad buuxda ay dowladda dhexe siinayso maamulka cusub ee ka dhashay gobolladaas, gaar ahaan xilli Somaliland ay weli sheeganayso deegaannadaas, islamarkaana ay dhawaan ka heshay Israa’iil aqoonsi.
Falanqeeyayaal ayaa tilmaamaya in tani ay fariin u dirayso gudaha iyo dibadda labadaba, oo ah in Waqooyi Bari loo arko qayb ka mid ah midnimada Jamhuuriyadda Federaalka Soomaaliya, isla markaana aan laga leexan doonin qaab-dhismeedka federaalka.
Wafdiga caalamiga ah
Ka-qeybgalka safiirro iyo diblomaasiyiin ka kala socda Turkiga, Suudaan iyo Sacuudiga ayaa munaasabadda u yeelay miisaan caalami ah. Joogitaankooda Laascaanood waxaa loo fasiray in maamulka Waqooyi Bari uu helayo indhaha caalamka iyo tixgelin diblomaasiyadeed, taas oo xoojinaysa mowqifka Dowladda Federaalka ee ku aaddan midnimada iyo madaxbannaanida dalka.
Galmudug: xaliifka koowaad ee Villa Somalia
Maamulka Galmudug, oo uu hoggaaminayo Madaxweyne Axmed Cabdi Kariye (Qoor-qoor), ayaa noqday dowlad-goboleedka sida weyn uga dhex muuqda xafladda, taas oo muujinaysa is-waafajin siyaasadeed oo xooggan oo kala dhaxeeysa Villa Soomaaliya. Ka-qeybgalka Galmudug ayaa loo arkaa taageero cad oo loo fidinayo ballaarinta nidaamka federaalka.
